Bændur | Hvað er ylrækt - vörur | Hvað er útirækt - vörur | Vistvæn ræktun | Lífræn ræktun 

Garðyrkjustöðin Varmaland var byggð árið 1938 út úr landi Reykholts í Borgarfirði og er því með elstu garðyrkjustöðvum á landinu. Sveinn Björnsson rekur garðyrkjustöðina í dag en hann ólst upp á Varmalandi og tók við garðyrkjunni af föður sínum árið 1973.

Ekkert þeirra upphaflegu gróðurhúsa sem byggð voru á árunum eftir 1938 stendur í dag en Sveinn hóf að byggja ný gróðurhús stuttu eftir að hann tók við, eða árið 1979. Þau þekja nú um 2060 fermetra lands. Á Varmalandi eru eingöngu ræktaðir tómatar og er ársframleiðslan um 60 tonn. Tómatarnir eru ræktaðir í jarðvegi, þeim er sáð í desember og eru hafðir undir lýsingu fram í febrúar. Tínslan hefst svo um miðjan apríl og eru tómatarnir tíndir út nóvember. Eftir það er allt hreinsað út úr gróðurhúsunum og þau sótthreinsuð áður en sáð er á ný. Ræktunin í Varmalandi er vistvæn, býflugur sjá um að frjóvga plönturnar og leggur Sveinn áherslu á halda húsunum hreinum og hefur Garðyrkjustöðin Varmaland verið laus við alla óværu síðustu ár.

Tómatarnir eru tíndir þrisvar í viku og þeim pakkað á staðnum. Sendingar fara svo tvisvar í viku frá garðyrkjustöðinni til neytenda. Gróðurhúsin eru hituð upp með jarðhita og stendur garðyrkjustöðin í nágrenni við tvo sögufræga hveri, Skriflu og Dynk.  Heitt vatn frá hverunum hefur verið nýtt á staðnum öldum saman en við fornleifauppgröft hafa fundist veitustokkar út frá Skriflu sem grafnir voru á miðöldum.

Smellið á myndirnar til að stækka þær og skoða betur