Bændur | Hvað er ylrækt - vörur | Hvað er útirækt - vörur | Vistvæn ræktun | Lífræn ræktun 

Hjónin Helgi Jakobsson og Hildur Ósk Sigurðardóttir reka garðyrkjustöðina Gufuhlíð í Reykholti. Þar rækta þau agúrkur og framleiða um 430 tonn á ári af gúrkum.

Gufuhlíð er fjölskyldufyrirtæki. Áður höfðu foreldrar Helga, Jakob Helgason og Birna Guðmundsdóttir, stundað garðyrkju á staðnum frá árinu 1965 en Helgi og Hildur komu inn í reksturinn árið 1997. Síðan hefur stöðin verið byggð upp, gróðurhúsin endurnýjuð og stækkuð og þekja nú um 3800 fermetra lands. Einnig var raflýsingu komið upp í öllum gróðurhúsunum svo nú er stunduð ræktun árið um kring en áður hafði einungis verið ræktað yfir sumartímann.

Helga og Hildi Ósk er umhugað um gæði framleiðslunnar. Þau stefna á að auka bæði magn og gæði ræktunarinnar í Gufuhlíð og hafa nú um tíma gert tilraunir með milliplöntun með það að markmiði að aldrei komi bil í uppskeruna.

Ræktunin í Gufuhlíð er vistvæn, gúrkurnar eru ræktaðar í vikri og er lífrænum vörnum beitt á plönturnar. Gróðurhúsin eru hituð upp með hveravatni en jarðhiti er á svæðinu og hefur einnig verið borað eftir heitu vatni á jörðinni

Gúrkurnar í Gufuhlíð eru tíndar sex daga vikunnar, þeim pakkað á staðnum og fara sendingar þrisvar í viku frá garðyrkjustöðinni til neytenda.

Smellið á myndirnar til að stækka þær og skoða betur