Blaðlauk á að geyma í kæli nálægt 0-2°C. Honum hættir nokkuð til að þorna og því ber að forðast að hafa hann nálægt súg. Gott er að pakka honum inn í plast til að koma í veg fyrir þornun.

 

Blaðkaukur hentar vel í alla rétti þar sem gert er ráð fyrir að nota lauk, þar á meðal í salöt, súpur, pottrétti og margt fleira. Hann má sjóða í vatni eða steikja í smjöri og gufusjóða á eftir. Hæglega má nota blaðlauk sem aðalrétt, smjörsteiktan og bakaðan með skinku- eða beikonbitum og osti. Ljóst skaftið þykir ljúffengast en grænu blöðin eru næringarríkust.

 

Blaðlaukur hentar afar vel til frystingar; þá er hann skorinn langsum inn að miðju, skolaður og brytjaður niður. Stærri bita er betra að snöggsjóða í 1-2 mínútur. Látið vatnið renna vel af þeim og setjið í frystipoka í hæfilegum skömmtum. Blaðlauk í strimlum eða litlum bitum sem nota á í súpur eða pottrétti er óþarfi að sjóða fyrir frystingu. Frosinn blaðlauk er best að nota í soðna rétti, en eigi að nota hann í salöt þarf að neyta hans um leið og hann þiðnar.