Georg

Flúðasveppir voru stofnaðir árið 1984. Fyrsta árið voru framleidd 500 kíló af sveppum á viku og þótti gott. Ræktunin hefur undið upp á sig með árunum og  í dag eru framleidd 10 tonn á viku. Ræktaðar eru tvennar tegundir sveppa hjá Flúðasveppum, hvítir massasveppir og brúnir kastaníusveppir, en þeir eru sagðir sérstaklega góðir fyrir meltinguna.

Georg Ottósson tók við rekstri Flúðasveppa árið 2005. Hann hafði þá verið formaður SFG í nokkur ár og fannst svepparæktun spennandi verkefni.

Georg hefur það að markmiði að bæta framleiðsluna á hverju ári og leggur mikið upp úr samvinnu við aðra bændur í héraðinu. Meðal annars framleiða Flúðasveppir eigin rotmassa sem sveppirnir eru ræktaðir í. Þá er afgangshálmi frá kornræktarbændum á Suðurlandi og skít frá kjúklingabúum í Rangárvallasýslu blandað saman við íslenskt vatn og látið molta í nokkrar vikur, áður en sveppagróum er sáð í hann. Georg ræktar einnig korn á ökrum í Gunnarsholti sem hann notar í rotmassann. Strandreyr er ræktaður í Hvítárholti til íblöndunar í sveppamassa 80 hekturum

Um 60 tonn af rotmassa verða til á viku og er hann líka nýttur til að framleiða úrvals gróðurmold (Flúðamold)  til ræktunar en þá er honum blandað saman við mómold og Hekluvikur. Gróðurmoldin er til dæmis notuð þar sem fram fer lífræn ræktun og stefnir Georg á að fá lífræna vottun fyrir Flúðasveppi fljótlega.
Um 30 manns vinna hjá Flúðasveppum. Sveppirnir eru handtíndir og er um helmingur starfsfólks eingöngu við að tína. Sveppirnir eru flokkaðir í höndunum og þeim pakkað á staðnum áður en þeir eru sendir til neytenda. Svepparæktin er nákvæmisverk úr íslensku hráefni. Ræktunarstjóri er Eiríkur Ágústsson.

Smellið á myndirnar til að stækka þær og skoða betur

Senda ß vin

Loka